თბილისში, სავაჭრო ცენტრ თბილისი მოლთან მიმდინარე აქციაზე, სავარაუდოდ, კოალიცია ცვლილებებისთვის ერთ-ერთი ლიდერი, ნიკა მელია და გიგი უგულავა დააკავეს. 

სოციალურ ქსელსა და მედიაში გავრცელებული ინფორმაციით, აქციაზე, სავარაუდოდ, დააკავეს ასევე კოალიცია ცვლილებებისთვის ერთ-ერთი ლიდერი, გიორგი კირთაძე და ენმ-ს წევრი, დიმიტრი ბიძინაშვილი. 

2 თებერვალს, 16:00 საათზე თბილისი მოლის მიმდებარედ საპროტესტო მარშების გაერთიანება და რამდენიმე საათით დიღმის გზის გადაკეტვა იგეგმებოდა. 

უწყვეტი პროტესტის 67-ე დღეს თბილისის შემოსასვლელთან, სავაჭრო ცენტრ თბილისი მოლთან მიმდინარე საპროტესტო აქციაზე პოლიციამ მოქალაქეების დაკავება დაახლოებით საღამოს 6 საათისთვის დაიწყო - ამ დროისთვის მაგისტრალზე მოძრაობა გადაკეტილი არ იყო ავტომობილებისთვის. 

იმ დროს როცა მოქალაქეების დაკავება დაიწყო, გზის საავტომობილო ნაწილი ნაწილობრივ პოლიციას ჰქონდა დაკავებული და მოქალაქეები მხოლოდ ერთ ზოლს იკავებდნენ.