"უკრაინამ დასავლური მომავალი აირჩია, სწორედ ამიტომ, რუსეთმა ღიად და საჯაროდ გამოაცხადა, რომ სურს უკრაინული იდენტობა წაშალოს და მისი, როგორც სახელმწიფოს არსებობა დაასრულოს. ეს ხომ ფაქტია? არ მესმის, ამის შემდეგ, რუსულმა პროპაგანდამ როგორ უნდა მოახდინოს გავლენა იმ ადამიანებზე, რომლებიც კრემლის განცხადებებს საჯაროდ ისმენენ. რა თქმა უნდა, ეს საფრთხეს უქმნის სრულიად დემოკრატიულ საერთაშორისო სისტემას, რომლის დაცვის სადარაჯოზეც ერთად უნდა ვიდგეთ. პუტინის სტრატეგიაა, დაგვყოს და უკრაინაზე ფოკუსი ეტაპობრივად დავკარგოთ, თუმცა ამ მიზანს ვერ აღწევს და არსებობს მყარი მოლოდინი, რომ ვერც ვერასდროს შეძლებს. დასავლეთის ასეთი ერთიანობა მას ყველაზე მეტად აცოფებს, რასაც დარწმუნებული ვარ, უკრაინაში შეჭრისას ვერც კი წარმოიდგენდა. რუსეთი ევროპული ქვეყნებისთვის არამხოლოდ საგარეო საფრთხედ იქცა, ის ტრანსფორმირდა შიდა საფრთხედაც, რადგან შიდა პოლიტიკურ განხილვებშიც კი, უკვე ბევრს ვსაუბრობთ, თუ როგორ უნდა გავუმკლავდეთ კრემლიდან მომავალ გამოწვევებს. სამწუხაროდ, უნდა ვაღიაროთ, რომ წლების წინ, ასეთი მიდგომა ნამდვილად არ გვქონდა. ჩვენმა სტრატეგიამ რუსეთთან არ იმუშავა და დღეს ჩანს, რომ შეცდომაც კი იყო. თუმცა შეცდომის გამოსწორების დრო ყოველთვის გვაქვს და ახლა ვითარების შეცვლა სწორედ იმით შეგვიძლია, კრემლს გამარჯვების შესაძლებლობა არ მივცეთ. თუ გარკვეული ჯგუფი, სკეპტიკურად იყო განწყობილი დეკემბრის სამიტის წინ და ფიქრობდა, რომ უკრაინასთან ევროკავშირში გაწევრიანებასთან დაკავშირებით მოლაპარაკებების გახსნას ვერ შევძლებდით, ევროსაბჭომ ამ გადაწყვეტილების მიღება მოახერხა. ეს ისტორიული შეთანხმება გახლდათ და დარწმუნებული ვარ, სწრაფი ტემპით შევძლებთ კიდევ უფრო მაღალ საფეხურებზე გადასვლას", - განაცხადა საფრანგეთის პარლამენტისა და მმართველი პარტიის წარმომადგენელმა ბენჟამინ ჰადადმა Globalnews.ge-სთან ინტერვიუში.