მაიკ უოლცი: რუსეთთან აზრთა მიმოცვლა გვაქვს არა მხოლოდ უკრაინაში ცეცხლის შეწყვეტაზე, არამედ ზოგადად როგორი იქნება აშშ-რუსეთის ურთიერთობა

ეროვნული უსაფრთხოების საკითხებში აშშ-ის პრეზიდენტის, დონალდ ტრამპის მრჩევლის, მაიკ უოლცის განცხადებით, ამჟამად შეერთებული შტატებისა და რუსეთის პრეზიდენტებს შორის არ არსებობს კონკრეტული საკითხები, რომლის განხილვაც შესაძლოა შეხვედრის მიზეზი გახდეს. მისივე თქმით, ორი ქვეყანა დღეს საუბრობს როგორც უკრაინაში ცეცხლის შეწყვეტის შეთანხმებაზე, ასევე, თუ როგორ გაგრძელდება სახელმწიფოებს შორის დიპლომატიური ურთიერთობები.

"მოლაპარაკებებისა და ჩართულობის სერია გვაქვს ჩემს დონესა და ქვემოთ. აზრთა მიმოცვლა გვაქვს იმაზე, თუ როგორი სურათი იქნება მომავალში, არა მხოლოდ უკრაინაში ცეცხლის შეწყვეტისთვის, არამედ ზოგადად როგორი იქნება აშშ-რუსეთის ურთიერთობა. მნიშვნელოვანი პირველი ნაბიჯია, რომ სახელმწიფო მდივანმა მარკო რუბიომ და მისმა კოლეგამ, ლავროვმა ჩვენი საელჩოები კვლავ აამუშაონ. რთულია ურთიერთობების განვითარებაზე საუბარი, თუ მოქმედი საელჩოები არ გვაქვს", - აღნიშნა მაიკ უოლცმა. 

უკრაინის საკითხზე საუბრისას მან ასევე დასძინა, რომ შეერთებული შტატები NATO-ში უკრაინის გაწევრების საკითხის განხილვას არ აპირებს, თუმცა საფრანგეთისა და დიდი ბრიტანეთის წინადადებას მათი მხრიდან უსაფრთხოების გარანტიების უზრუნველყოფის შესახებ "სრულად უჭერს მხარს". 

"ეს [უკრაინის NATO-ში გაწევრება] მაგიდაზე არ დევს. ვერ ვხედავ, რომ NATO-ში უკრაინა შეგვყავს და შემდეგ აშშ-ის ჯარისკაცებს არსებითად ვავალდებულებთ, დაუყოვნებლივ, რომ მე-5 მუხლის ფარგლებში უკრაინა დაიცვან. ეს ძალიან განსხვავებულია, ამის შესახებ მინდა ძალიან ცხადად ვთქვა - ჩვენთან პრეზიდენტი მაკრონი მოდის, დიდი ბრიტანეთის პრემიერი სტარმერი მოდის, ეს ძალიან განსხვავებულია NATO-სა და NATO-ს არსებული წევრი ქვეყნების მიმართ აშშ-ის ვალდებულებებისგან, ზოგადად NATO-ს მიმართ, სხვა ქვეყნებთან ჩვენს მე-5 მუხლით გათვალისწინებული შეთანხმებების მიმართ ძალიან ერთგულები ვართ, თუმცა უკრაინისთვის უსაფრთხოების გარანტიები სრულად სხვა საუბარია. 

სრულად ვუჭერთ მხარს იმას, რომ როგორც საფრანგეთი, ისევე დიდი ბრიტანეთი და სხვა ევროპელები ამბობენ, რომ ენდომებოდათ, უკრაინის მომავლისთვის ძალიან მტკიცე უსაფრთხოების გარანტიების უზრუნველყოფაში ჩაერთონ. ეს განსხვავებული საუბარია, რომელიც გვამხნევებს, რადგან ევროპას წლების განმავლობაშია ვთხოვთ, რომ საკუთარი თავდაცვა გააუმჯობესოს და წლებია, ვითხოვთ, რომ ევროპამ თავისი თავდაცვის საფასური გადაიხადოს, რადგან უკვე ათწლეულებია, რაც აშშ-ს გადასახადის გადამხდელი უსამართლო ტვირთს ატარებს", - განაცხადა მაიკ უოლცმა.

ცნობისთვის, რუსეთის საგარეო საქმეთა მინისტრის მოადგილემ 22 თებერვალს განაცხადა, რომ რუსეთის პრეზიდენტს, ვლადიმირ პუტინსა და აშშ-ის პრეზიდენტ დონალდ ტრამპს შორის შეხვედრისთვის მზადება უკვე დაწყებულია. მისივე თქმით, სამიტისთვის მოსამზადებელი სამუშაოები ჯერჯერობით საწყის ეტაპზეა.

გარდა ამისა, რიაბკოვმა თქვა, რომ შესაძლო სამიტი არა მხოლოდ უკრაინაში ომს, არამედ ზოგადად აშშ-რუსეთის ურთიერთობის რელევანტურ საკითხებს შეეხება. 

მანამდე, აშშ-ს სახელმწიფო მდივანმა მარკო რუბიომ ინტერვიუში თქვა, რომ პრეზიდენტ დონალდ ტრამპსა და ვლადიმირ პუტინს შორის პოტენციური შეხვედრა მეტწილად დამოკიდებულია იმაზე, თუ რამდენად იქნება პროგრესი უკრაინაში ომის დამთავრების საკითხზე.