ამერიკული გამოცემის მიერ მოპოვებული კანონპროექტის სამიზნეები არიან მმართველი პარტიის დეპუტატები და სამართალდამცავი სტრუქტურების თანამშრომლები, ასევე სავარაუდო რუსეთის აგენტები.

ოფიციალურ პირებს, რომლებიც პასუხისმგებელნი არიან საქართველოში რუსული სტილის „უცხოეთის აგენტების“ კანონის მიღებაზე, შეიძლება დაემუქროთ აქტივების გაყინვა და მოგზაურობის აკრძალვა ახალი კანონპროექტის მიხედვით, რომელიც აშშ-ის კონგრესს უახლოეს მომავალში წარედგინება.

კანონპროექტში, რომელიც POLITICO-მ იხილა, ნათქვამია, რომ მმართველი პარტია „ქართული ოცნება“, სამწუხაროდ, სულ უფრო მზარდად ატარებს რუსეთის ფედერაციასთან შეთანხმების პოლიტიკას და არალიბერალური მიმართულებით მიჰყავს ქვეყანა. კანონპროექტი ასევე ხაზს უსვამს, რომ თბილისი ღიად ესხმის თავს აშშ-სა და დემოკრატიის ხელშემწყობ სხვა დასავლურ ორგანიზაციებს, ასევე ადგილობრივ და საერთაშორისო სამოქალაქო საზოგადოებას, და ამავდროულად ზრდის კავშირებს რუსეთთან და ჩინეთთან.

სამხრეთ კაროლინის შტატის რესპუბლიკელი წარმომადგენელი ჯო უილსონი კანონპროექტს ორშაბათს წარადგენს. მისი პირობები ავალდებულებს ამერიკელ მაღალჩინოსნებს, აცნობონ კონგრესს „არასათანადო პოლიტიკური გავლენის, კლეპტოკრატიისა და ელიტური კორუფციის შესახებ საქართველოში“, ასევე რუსეთისა და ჩინეთის სადაზვერვო აქტივების შესახებ, რომლებიც მოქმედებენ სამხრეთ კავკასიის ამ ქვეყანაში.

„დემოკრატიის დაცვისა და უზრუნველყოფისთვის“ კანონპროექტი სანქციებს ითვალისწინებს მთავრობის წარმომადგენლებისა და სხვა ადამიანების წინააღმდეგ, რომლებსაც „აკისრიათ მატერიალური პასუხისმგებლობა საქართველოში დემოკრატიის, ადამიანის უფლებების ან უსაფრთხოების შელახვის ან დაზიანებისათვის“. ის დააწესებს სავიზო აკრძალვას პოლიტიკოსებისთვის და მათი ოჯახებისთვის, რომლებიც პასუხისმგებელნი არიან „რუსული ტიპის უცხოური აგენტების კანონმდებლობის“ მიღებაზე, რომელიც მიმართულია არასამთავრობო ორგანიზაციებისა და მედია საშუალებების წინააღმდეგ.

სასჯელები ასევე შეეხებათ საქართველოს სამართალდამცავ ორგანოებსა და უშიშროების სამსახურებს, რომლებმაც ძალადობრივად უპასუხეს პროტესტს უცხოური აგენტების კანონპროექტის წინააღმდეგ.

გასულ კვირას საქართველოში ვიზიტისას, აშშ-ის სახელმწიფო მდივნის თანაშემწემ ევროპისა და ევრაზიის საკითხებში ჯეიმს ო'ბრაიენმა განაცხადა, რომ თუ საქართველო დაამტკიცებს კანონპროექტს უცხოური აგენტების შესახებ, იქნება ისეთი შეზღუდვები შეერთებული შტატების მხრიდან, რომლებიც გავლენას მოახდენს ამ კანონის უკან მდგომი ადამიანების ფინანსებსა ან მოგზაურობაზე. თეთრი სახლის პრესმდივანმა კარინ ჟან-პიერმა კი განაცხადა, რომ უცხოური აგენტების კანონმდებლობა, რომელიც ძალაში შევა, აიძულებს ვაშინგტონს, ფუნდამენტურად გადააფასოს ურთიერთობა საქართველოსთან.

ანალიტიკოსები და სქართველოს ოპოზიციონერი პოლიტიკოსები მზარდ ანტიდასავლურ პოზიციაში ბიძინა ივანიშვილის, ყოფილ პრემიერმინისტრსა და „ქართული ოცნების“ დამფუძნებელს ადანაშაულებენ. გასულ თვეში უცხოური აგენტების კანონის დასაცავად გამართულ მიტინგზე ივანიშვილმა განაცხადა, რომ ქვეყნის არასამთავრობო ორგანიზაციები „გლობალური ომის პარტიის“ შეკვეთას ასრულებენ. ივანიშვილის აზრით, ეს არის ორგანიზაცია, რომელიც პასუხისმგებელია რუსეთთან კონფლიქტის გამოწვევაზე, რაც კრემლის სტილის პროპაგანდის გამოძახილია.