"ქართული ოცნება" ოპოზიციური პარტიების აკრძალვას აპირებს

"ქართული ოცნება" ოპოზიციური პოლიტიკური პარტიების გაუქმების პროცედურებს იწყებს. მმართველი პარტიის მიერ წარდგენილი კანონპროექტის მიხედვით, "მოქალაქეთა პოლიტიკური გაერთიანებების შესახებ" კანონის 36-ე მუხლს მე-2 პუნქტი დაემატება.

საჩივრის საფუძველზე თუ საკონსტიტუციო სასამართლო მიიჩნევს, რომ კონკრეტული პოლიტიკური პარტია საქართველოს კონსტიტუციური წყობილების დამხობის ან ხელისუფლების ძალადობით შეცვლისთვის დგამს ქმედით ნაბიჯებს, ის გაუქმებულად გამოცხადდება. ამას გარდა ამ პარტიაში მყოფ ადამიანებს, არც მომავალში მიეცემათ სხვა პარტიის დაფუძნების უფლება. "ქართული ოცნების" ლიდერები ამბობენ, რომ ამ გადაწყვეტილებით სახელმწიფოსა და სუვერენიტეტს იცავენ და ამაში ანტიდემოკრატიულს ვერაფერს ხედავენ.

"გარკვეული სუბიექტები უკვე პოლიტიკურ პარტიებადაც აღარ იწოდებიან. ისინი მთავარი ლოზუნგის ქვეშ გაერთიანდნენ და ზედაპირზე ამოვიდა მათი კონსპირაციული თუ ნახევრად კონსპირაციული მისწრაფებები ხელისუფლების ძალადობრივად დამხობისკენ. ეს არის დესტაბილიზაციის მცდელობა. უკვე აშკარად დაიწყო მცდელობა და ორგანიზება, რომ ეკონომიკური ზიანიც მიაყენონ ქვეყანას, ბიუჯეტს. ამის ჩამდენი, მით უმეტეს უცხოეთიდან დაფინანსებული, უცხო ქვეყნებიდან მომდინარე სცენარით DEEP STATE-ის ხელმძღვანელობითა და უზარმაზარი კონსპირაციული ქსელით, რასაკვირველია, ვეღარ იწოდება პოლიტიკურ პარტიად. ამიტომ სახელმწიფო კანონიერად მიიღებს შესაბამის ზომებს. რამდენად სამართლიანია, სხვა საკითხია, მაგრამ პოლიტიკურ პარტიად აღარ იწოდება ის, რომელიც ფიქრობს ფაშისტური სტანდარტის დანერგვას", – მმართველი პარტიის ერთ-ერთი ლიდერი გია ვოლსკი.

"ქართული ოცნების" ამ გადაწყვეტილებას "ნაციონალურ მოძრაობასთან" ერთად სხვა ოპოზიციური პარტიებიც აიკრძალოს, დიქტატურის გაფორმების მცდელობად აფასებენ მათი პოლიტიკური ოპონენტები. ოპოზიციონერი პოლიტიკოსები აცხადებენ, რომ ამას მმართველი გუნდისა და უპირველეს ყოვლისა ქვეყნის დემოკრატიისთვის მძიმე შედეგები მოჰყვება. მათივე თქმით, სხვა რეპრესიული კანონების მიღებასთან ერთად პარტიების გაუქმება  წინააღმდეგობის მუხტს კიდევ უფრო გააძლიერებს.

"პარტიების აკრძალვა ხდება დიქტატორულ რეჟიმებში. ეს არის ლეგალისტური გზა, რომ მათ დაამყარონ დიქტატურა. პირთა სია, ვისაც უნდა აეკრძალოს საქმიანობა, უნდა დაადგინოს, მაგალითად, ნაცმა თენგიზ შარმანაშვილმა, რომელიც "ნაციონალური მოძრაობის" ელჩი იყო ერევანში და ე.ი. ბატონი შარმანაშვილიც წყვეტს პოლიტიკურ საქმიანობას? გივი მიქანაძეც  წყვეტს პოლიტიკურ საქმიანობას? ბექა ოდიშარიაც და სხვებიც? თუ ეს ასეა, მაშინ რაღაც პრობლემა აქვთ ამ გათვლებში და სინამდვილეში, ეს ყველაფერი არის მცდელობა, რომ ყურადღება გადაიტანონ ადამიანების რეალური პრობლემებიდან, უმძიმესი სოციალური ფონიდან, ემიგრაციიდან, რომლის ქვეყნიდან გადინება არ წყდება, იმ უდიდესი ეკონომიკური კრიზისიდან და პოლიტიკური კატასტროფიდან, რაშიც ქვეყანას ამყოფებს "ქართული ოცნება", – ამბობს
"ლელოს" ერთ-ერთი ლიდერი თაზო დათუნაშვილი.

საკონსტიტუციო სასამართლოს შესახებ კანონში შესატანი ცვლილებით სასამართლომ გადაწყვეტილება სარჩელის შეტანიდან არაუმეტეს 9 თვეში უნდა მიიღოს, ხოლო საარჩევნო პერიოდში – 14 დღეში. პარტიის აკრძალვის ან თვითლიკვიდაციის შემდეგ დარჩენილი ქონება სახელმწიფო ხაზინას გადაეცემა. "ქართული ოცნება" აპირებს, რომ ეს ცვლილება ერთხმად და დაჩქარებულად მიმდინარე სასესიო კვირაში მიიღოს. 

 წყარო: EURONEWSGEORGIA