პრეზიდენტმა სალომე ზურაბიშვილმა განაცხადა, რომ თბილისის საერთაშორისო აეროპორტში ჩამოსვლისას ე.წ. „ტიტუშკების“ მიერ მისთვის კვერცხების სროლის ფაქტის გამოძიებას ითხოვს. 18 თებერვალს პრესკონფერენციაზე საუბრისას მან თავდასხმას „წინასწარ ორგანიზებული ძალადობა“, „პატარა კაცების პატარა ბოღმა“ და „’ოცნების’ მიერ გამართლებული ძალადობა“ უწოდა.  

„ეს ნიშნავს, რომ სახელმწიფოს არ სცემენ პატივს“, – განაცხადა ზურაბიშვილმა და დასძინა, რომ „ამ შემთხვევაში მე ვარ იმის სიმბოლო, რასაც ებრძვის „ქართული ოცნება“ – ქართულ სახელმწიფოს, ქართულ ტრადიციებს, ქართულ ზრდილობას … და საქართველოს სურათს მსოფლიოში“.

პრეზიდენტმა ზურაბიშვილმა თავდასხმა მმართველი პარტიის სისუსტის ქმედებად შეაფასა და აღნიშნა „მათ შეუძლიათ მხოლოდ რეპრესიული ზომების მიღება და კვერცხების სროლა… ეს თუ სისუსტის ნიშანი არ არის, მე არ ვიცი რისი ნიშანია“. მან ასევე გააკრიტიკა „ქართული ოცნების“ ხელისუფლების ლიდერობის უნარი და განაცხადა, რომ ისინი ვეღარ მართავენ საქართველოს და აღარ იციან როგორ მართონ ქვეყანა.

ზურაბიშვილმა თავდასხმის უფრო ფართო შედეგების თაობაზეც გამოხატა შეშფოთება  და სახელმწიფოს მიერ უსაფრთხოებისა და წესრიგის დაუცველობაზე მიუთითა. იგი დაინტერესდა, როგორ შეიძლება მოხდეს ასეთი ინციდენტები, მათ შორის „ქართული ოცნების“ ყოფილ პრემიერ-მინისტრ გიორგი გახარიაზე თავდასხმა ისეთ ცენტრალურ ადგილას, როგორიც აეროპორტია, რაც ხაზს უსვამს ხელისუფლების უუნარობას, თავიდან აიცილოს პოლიტიკურად მოტივირებული ძალადობა. ზურაბიშვილმა ასევე აღნიშნა, რომ სოციალურ ქსელში მის მიმართ იყო მუქარა, რის შესახებაც მან იცოდა და რომ პოლიციას უნდა სცოდნოდა თავდასხმის შესახებ და აღეკვეთა ის, თუმცა ეს არ გააკეთა.

ზურაბიშვილმა ხაზგასმით აღნიშნა, რომ სახელმწიფომ ყველასთვის უნდა უზრუნველყოს უსაფრთხოება, მათ შორის განსხვავებული პოლიტიკური შეხედულების მქონე პირთათვის. „სახელმწიფო არის როცა წესრიგი დაცულია, როცა უსაფრთხოება დაცულია ყველასთვის, თუნდაც იმ ადამიანებისთვის, რომლებიც არ მოგწონს მათი პოლიტიკური ხედვისთვის. ეს არის სახელმწიფო და სახელმწიფოს გვიკარგავენ დღითი დღე“.

სალომე ზურაბიშვილმა მადლობა გადაუხადა ქართულ საზოგადოებას და საერთაშორისო პარტნიორებს მხარდაჭერისთვის.

მან ასევე პირობა დადო, რომ მეორე დღეს ინტერვიუს მისცემს ტელეკომპანია „ფორმულას“, სადაც საზოგადოებას მიუნხენის უსაფრთხოების კონფერენციის ფარგლებში გამართულ შეხვედრებზე ვრცლად მოუყვება.

სალომე ზურაბიშვილმა ასევე გამოიყენა შესაძლებლობა და მადლობა გადაუხადა „ნეტგაზეთის“ დირექტორს, მზია ამაღლობელს, „იმისთვის, რაც მან გააკეთა და იმისთვის, რაც მან დღეს გააკეთა, როცა შეწყვიტა შიმშილობა. ჩვენ გვჭირდება ლიდერები, ჩვენ გვჭირდება მაგარი ქალები, გვჭირდება მაგარი პიროვნებები – ცოცხალი, არ გვჭირდება მსხვერპლი, ჩვენ გვჭირდება გამარჯვების სული.” მან ამაღლობელს მალე გამოჯანმრთელება უსურვა.

გუშინ თბილისის საერთაშორისო აეროპორტში ოპოზიციის ლიდერს გიორგი გახარიას და მისი პარტიის წევრს ელგუჯა ხოკრიშვილს ასევე დაუშინეს კვერცხები. ისინიც მიუნხენის უსაფრთხოების კონფერენციიდან ბრუნდებოდნენ, როდესაც ე.წ. „ტიტუშკების“ თავდასხმის სამიზნეები გახდნენ. აეროპორტში პოლიციელების ყოფნის მიუხედავად, გავრცელებული ინფორმაციით, ისინი არ ჩარეულან.