განცხადება გაავრცელა ვენესუელის მმართველმა ნიკოლას მადურომ და აღნიშნა, რომ "ვაშინგტონი ისე ერევა საქართველოს საშინაო საქმეებში, თითქოს მისი კოლონიაა". მადურომ, რომლის რეჟიმიც რუსეთის მოკავშირეა და სამხრეთ ოსეთისა და აფხაზეთის დამოუკიდებლობასაც აღიარებს, განაცხადა, რომ საქართველოს მმართველმა პარტიამ "სამაგალითო გამარჯვებას" მიაღწია.

"საქართველო, საბჭოთა კავშირის დაშლის შემდეგ, აშშ-სთან მჭიდროდ დაკავშირებულ გზას დაადგა. თუმცა წლების განმავლობაში გაჩნდა და ხელისუფლებაში მოვიდა პროგრესული მემარცხენე და ნაციონალისტური ხელისუფლება. გასულ კვირას მათ საქართველოს მოსახლეობის ხმების 56%-ით, სამაგალითო გამარჯვება მოიპოვეს", - აცხადებს ნიკოლას მადურო. 

სოციალურ ქსელში გამოაქვეყნა მილოცვა სომხეთის პრემიერ-მინისტრმა ნიკოლ ფაშინიანმა.  

"ვულოცავ საქართველოს პრემიერ-მინისტრს, ირაკლი კობახიძეს და პარტია "ქართულ ოცნებას" საპარლამენტო არჩევნებში გამარჯვებას. მჯერა, რომ სომხეთი-საქართველო სტრატეგიული ურთიერთობები გააგრძელებს მდგრად განვითარებას - მოძმე  ხალხების საკეთილდღეოდ",- დაწერა X-ზე სომხეთის პრემიერ-მინისტრმა. 

საქართველოს მთავრობის პრესსამსახურმა გაავრცელა აზერბაიჯანის პრემიერ-მინისტრ ალი ასადოვის მილოცვა პრემიერ-მინისტრ ირაკლი კობახიძისადმი.

"გულითადად გილოცავთ თქვენს ქვეყანაში გამართულ საპარლამენტო არჩევნებში პარტია „ქართული ოცნება – დემოკრატიული საქართველოს“ გამარჯვებას. ამ გამარჯვებამ კიდევ ერთხელ დაადასტურა მეგობარი ქართველი ხალხის მიერ ქვეყნის წამყვანი პოლიტიკური ძალის „ქართული ოცნების“ მიერ განხორციელებული პოლიტიკური კურსის მხარდაჭერა", - აღნიშნავს ალი ასადოვი. 

საქართველოს პრემიერ-მინისტრსა და "ქართულ ოცნებას" არჩევნებში გამარჯვება მიულოცა თურქეთის პრეზიდენტმა რეჯეპ ტაიპ ერდოღანმა და განაცხადა, რომ "არჩევნებმა ქართველი ხალხის ნება გამოკვეთა". 

"გულწრფელად გილოცავთ 2024 წლის 26 ოქტომბერს გამართულ საპარლამენტო არჩევნებში თქვენი ლიდერობით პარტია „ქართული ოცნების“ გამარჯვებასა და პირველი ადგილის მოპოვებას. ვიმედოვნებ, რომ არჩევნების შედეგები წარმატების მომტანი იქნება საქართველოს ხალხისა და ჩვენი რეგიონისთვისაც. სასიხარულოა, რომ არჩევნებმა, რომელმაც ქართველი ხალხის ნება გამოკვეთა, მშვიდ და უსაფრთხო გარემოში ჩაიარა“,- ამბობს თურქეთის პრეზიდენტი ერდოღანი.