ევროპის საბჭოს საპარლამენტო ასამბლეის დეკლარაციაში საქართველოში წინასაარჩევნო პერიოდია შეფასებული და ნათქვამია, რომ "საქართველოდან საგანგაშო ცნობები მოდის, თუ როგორ ემზადება მმართველი პარტია მომავალი საპარლამენტო არჩევნების მოპარვისთვის". დეკლარაციას სახელწოდებით - "არჩევნები საქართველოში - საგანგაშო მოვლენები", 24 დეპუტატი აწერს ხელს. დოკუმენტში ასევე მითითებულია იმ მეთოდების შესახებ, რითაც ამომრჩევლებს წინასაარჩევნოდ ემუქრებიან. 

"საგანგაშო ცნობები მოდის საქართველოდან, რომლებიც, როგორც ჩანს, აჩვენებს თუ როგორ ემზადება მმართველი პარტია მომავალი საპარლამენტო არჩევნების მოპარვისთვის. ეს მოიცავს დაშინების მასობრივ კამპანიას ოპოზიციური კანდიდატებისა და მათი მხარდამჭერების წინააღმდეგ, რომელთა უძრავი ქონება იძარცვება და რომელთა ოჯახებს ემუქრებიან. ასევე, იყო ფიზიკური თავდასხმები ოპოზიციონერ აქტივისტებზე. ამომრჩევლებს ასევე აშინებენ ყალბი ინფორმაციის გავრცელებით, რომელიც კითხვის ქვეშ აყენებს ხმის ანონიმურობას - "მთავრობას ეცოდინება ვის მიეცი ხმა და ამას შედეგები მოყვება". ბევრ ეროვნულ სადამკვირვებლო ჯგუფს ხელს უშლიან თავისი სამუშაოს გაკეთებაში ანტი-კორუფციული კანონმდებლობის ბოროტად გამოყენებით იქამდეც კი, ვიდრე ე.წ. "უცხოური აგენტების კანონი" შევა ძალაში. საბოლოოდ, როგორც ჩანს, ცენტრალური საარჩევნო კომისია ცოტა ხნის წინ მმართველი პარტიის კონტროლის ქვეშ მოექცა. მსგავსმა ქმედებებმა წინასაარჩევნო გარემო შექმნა, რომელშიც ძალიან რთულია თავისუფალი და სამართლიანი არჩევნების ჩატარება. არჩევნების შედეგების საერთაშორისო აღიარების მისაღწევად [საქართველოს] ოფიციალურმა პირებმა უნდა შეწყვიტონ ანტი-დემოკრატიულად მოქმედება და შეცვალონ კურსი. არჩევნების საერთაშორისო დამკვირვებლების როლი, მათ შორის საპარლამენტო ასამბლეის კრიტიკულად მნიშვნელოვანია, რათა საქართველოს ხალხს საკუთარი მომავლის თავისუფლად განსაზღვრის საშუალება მიეცეს", - აღნიშნულია დეკლარაციაში.