კიევი ითხოვს, რომ ევროკავშირმა უკრაინას გაყინული რუსული აქტივებით მიღებული შემოსავლებიდან კიდევ ხუთი მილიარდი ევრო გადასცეს. ამის შესახებ Politico იუწყება. როგორც გამოცემა აღნიშნავს, ორგანიზაცია Euroclear-ს, რომელიც ფლობს რუსეთის აქტივების აბსოლუტურ უმრავლესობას ევროპაში, უფლება მიეცა შეენარჩუნებინა 2022 და 2023 წლებში ამ აქტივების ინვესტირებიდან მიღებული მოგება და არ გადაეცა ის კიევისთვის.

კიევის მომხრე ლობისტური ჯგუფის წარმომადგენელ ელენა გალუშკას თქმით კი, ამ ორი წლის განმავლობაში ხუთი მილიარდი ევროს მოგება „საერთაშორისო სავალუტო ფონდის პროგრამის ერთ წელიწადს უდრის, რაც საკმაოდ დიდი ფულია". მაგრამ ევროკავშირი საკუთარ თავს უზღუდავს მხოლოდ 2024 წლის 15 თებერვლის შემდეგ დარიცხულ შემოსავლებს, რადგან ეს არის თარიღი, როდესაც წევრი ქვეყნების მიერ კანონმდებლობის პირველი ნაწილი დამტკიცდა. ყველა მოგება, რაც ამ თარიღამდე იქნა მიღებული, Euroclear-ს უნდა დარჩეს. ევროკომისიის თანახმად, Euroclear-ის მიერ დაკავებული ხუთი მილიარდი ევრო არის ბუფერი რუსეთსა და სხვა ქვეყნებში მიმდინარე და პოტენციური იურიდიული საქმეების ხარჯების დასაფარად.

„2022-2023 წლების მოგება, რომელიც დაკავშირებულია რუსულ უძრავ აქტივებთან, გამოყოფილია „ჩვეულებრივი ბიზნესის“ ფარგლებში მიღებული მოგებისგან. ჩვენ არ ვანაწილებთ ამ მოგებას აქციონერებზე და ვინარჩუნებთ მათ, სანამ შემდგომ მითითებებს არ მივიღებთ“, - განმარტავენ Euroclear-ში.

რამდენიმე ხნის წინ, ავსტრიის საგარეო საქმეთა მინისტრმა ალექსანდრე შალენბერგმა მოუწოდა ევროპას, სიფრთხილე გამოიჩინოს გაყინული რუსული აქტივების გამოყენებასთან დაკავშირებით. მან ხაზგასმით აღნიშნა, რომ საუბარია საკუთრების უფლებებზე, ამიტომ შემოსავლების გადანაწილება კარგად უნდა იყოს გააზრებული.