ბრიუსელში, ევროკავშირის საგარეო საგარეო საბჭოს შეხვედრის დაწყებამდე, საგარეო საქმეთა მინისტრებმა საქართველოსთან დაკავშირებით განცხადებები გააკეთეს. 

ლიეტუვის საგარეო საქმეთა მინისტრის, კიასტუსის ბრუსის თქმით, "ლიეტუვაში უკვე დაუწესდათ სანქციები 30-მდე ადამიანს, რომლებიც პირდაპირ იყვნენ ჩართულები ოპოზიციის პროტესტის სასტიკ ჩახშობაში და ევროკავშირს მოუწოდებს, რომ ასევე შემოიღოს სანქციები ამ პირების წინააღმდეგ".

"იმედი გვაქვს, შევთანხმდებით ნაბიჯებზე, რომელიც საჭიროა იმ ფონზე, რასაც თბილისის ქუჩებში ვხედავთ. როცა ვხედავთ, რომ პოლიტიკური ოპოზიციის ლიდერებს აკავებენ, ვხედავთ ძალადობას აქციის მონაწილეების წინააღმდეგ, ეს არის, ის რასაც ვერ უგულებელვყოფთ. ლიეტუვაში უკვე დავუწესეთ სანქციები 30-მდე ადამიანს, რომლებიც პირდაპირ იყვნენ ჩართულები ოპოზიციის პროტესტის სასტიკ ჩახშობაში. ჩვენ მოვუწოდებთ ევროკავშირს, რომ ასევე შემოიღოს სანქციები ამ პირების წინააღმდეგ. მეორე საკითხი არის უვიზო მიმოსვლის რეჟიმი. უნდა ავკრძალოთ ის დიპლომატიური და სამსახურებრივი პასპორტის მფლობელებისთვის. ეს არის მინიმუმი, რაც უნდა გავაკეთოთ, ასევე უნდა გავაგზავნოთ ძლიერი მესიჯი, რომ შესაძლოა მომავალში ეს აკრძალვა გავაფართოოთ. მესამე საკითხი არის საქართველოსთან ტექნიკური და პოლიტიკური მოლაპარაკებების გამართვა საქართველო-ევროკავშირის ასოცირების ხელშეკრულების ფარგლებში, ასევე საქართველოს სამთავრობო ინსტიტუტებთან ყველა ინსტიტუციური მოლაპარაკებების შეჩერება და ასევე ამ ინსტიტუტებისთვის ფინანსური მხარდაჭერის შეჩერება. მეორე მხრივ, ჩვენ უნდა გავუგზავნოთ ძლიერი მესიჯი ქართულ სამოქალაქო საზოგადოებას, რომ ჩვენ მხარს დავუჭერთ მათ და ჩვენ გვჭირდება ფინანსური პაკეტი ამისთვის, იმის საჩვენებლად, რომ სერიოზულად ვსაუბრობთ. ასე რომ, სწორედ ახლა უნდა გავუგზავნოთ მესიჯი ქუჩებში გამოსულ ქართველ ხალხს, რომ ევროპა არ გტოვებთ თქვენ, ევროპა თქვენთანაა და ევროპას თქვენ სჭირდებით", - აღნიშნა კიასტუსის ბუდრისმა.

მედიასთან საქართველოს საკითხზე კომენტარი გააკეთა ლუქსემბურგის საგარეო საქმეთა მინისტრმა, ქსავიე ბატელიმაც. მისი თქმით, "საქართველოს მთავრობის ქცევა მიუღებელია, რასაცა აქციის მონაწილეების მიმართ იჩენს". 

"თუ ვამბობთ, რომ უნდა დავაწესოთ სანქციები არჩევნებთან დაკავშირებით, პირველ რიგში უნდა მოვისმინოთ, რომ იყო გაყალბება, რადგან, გულწრფელად რომ ვთქვათ, იქ იყო ასობით დამკვირვებელი და ჩემთვის მნიშვნელოვანია, იმის ნახვა, იყო თუ არ გაყალბება და არა ის, რომ უნდა დავსაჯოთ, რადგან არ მოგვწონს შედეგი. მაგრამ მთავრობის ქცევა მიუღებელია, აქციის მონაწილეების დასჯა, მათ მიმართ ასეთი ძალადობა მიუღებელია. ეს არის ის, სადაც უნდა დავსაჯოთ პასუხისმგებელი პირები, მაგრამ პარტიის დასჯა, რომელსაც კარგი შედეგი ჰქონდა ეს ჩემი აზროვნების სტილი არ არის. მაგრამ ამ საკითხზე უნდა გვქონდეს დახურულ კარს მიღმა საუბარი და 27 წევრს შორის თანხმობის მიღწევა იოლი არ არის", - უთხრა ქსავიე ბატელმა მედიას.