ალექსეი ნავალნის თანამებრძოლმა, ლეონიდ ვოლკოვმა თქვა, რომ რუსეთის ხელისუფლებამ გამოაქვეყნა "აღიარება, რომ მათ ნავალნი ციხეში მოკლეს". ოპოზიციონერი ლიდერის რუსეთის კოლონიაში გარდაცვალების ფაქტს მსოფლიო ლიდერები ეხმაურებიან. 

ვოლოდიმირ ზელენსკი, უკრაინის პრეზიდენტი: "ახლახან ცნობილი გახდა, რომ ალექსეი ნავალნი რუსეთის ციხეში გარდაიცვალა. როგორც ჩანს, ის მოკლა პუტინმა, ისევე როგორც ათასობით სხვა, ვინც ამ ერთი არსების გამო აწამეს. პუტინისთვის სულ ერთია, ვინ მოკვდება, მთავარია თავისი პოზიცია შეინარჩუნოს. ამიტომაც არ უნდა დავზოგოთ არაფერი. პუტინმა უნდა წააგოს, უნდა დაკარგოს ყველაფერი და აგოს პასუხი იმისთვის, რაც გააკეთა". 

იენს სტოლტენბერგი:"ჩვენ უნდა დავადგინოთ ყველა ფაქტი და რუსეთმა უნდა უპასუხოს ყველა სერიოზულ შეკითხვას მისი გარდაცვალების გარემოებების შესახებ". 

აშშ-ის სახელმწიფო მდივანი: "მისი სიკვდილი რუსეთის ციხეში და ერთი კაცის აკვიატება და შიში მხოლოდ ხაზს უსვამს პუტინის აშენებული სისტემის სისუსტესა და ლპობას. რუსეთს ამაზე პასუხისმგებლობა ეკისრება. მის სიკვდილზე პასუხისმგებელია რუსეთი და შეერთებულ შტატებს მჭიდრო კომუნიკაცია ექნება სხვა ქვეყნებთან ამ ვითარების შესახებ". 

კამალა ჰარისი, აშშ-ის ვიცე-პრეზიდენტი: „მათ რა ისტორიაც არ უნდა მოგვიყვნენ, მოდით ვიყოთ სრულიად ცხადები, პასუხისმგებლობა რუსეთს ეკისრება. შეერთებული შტატები ჯერ კიდევ ამ ინფორმაციას ამოწმებს, თუმცა თუ ის სიმართლეა, ეს იქნება პუტინის სისასტიკის კიდევ ერთი ნიშანი". 

რიში სუნაკი, დიდი ბრიტანეთის პრემიერ-მინისტრი: "საშინელი ამბავია. როგორც რუსული დემოკრატიის ყველაზე მტკიცე დამცველმა, ალექსეი ნავალნიმ წარმოუდგენელი გამბედაობა გამოიჩინა. ჩემი ფიქრები მის მეუღლესთან და რუს ხალხთანაა, ვისთვისაც ეს უდიდესი ტრაგედიაა."