სასამართლომ ერთ დღეში ოპოზიციის სამ ლიდერს პატიმრობა შეუფარდა

23 ივნისს, სასამართლომ ოპოზიციის სამ ლიდერს, მამუკა ხაზარაძესა და ბადრი ჯაფარიძეს, ასევე ზურაბ გირჩი ჯაფარიძეს პატიმრობა შეუფარდა. სამივე ლიდერს პარლამენტში, თეა წულუკიანის საგამოძიებო კომისიაზე გამოუცხადებლობას ედავებიან.

სასამართლომ "კოალიცია ცვლილებებისთვის" ერთ-ერთ ლიდერს, ზურაბ ჯაფარიძეს 7 თვით თავისუფლების აღკვეთა მიუსაჯა. აღნიშნული გადაწყვეტილება მოსამართლე ჯვებე ნაჭყებიამ მიიღო. მისივე გადაწყვეტილებით, ჯაფარიძეს მომდევნო 2 წლის განმავლობაში საჯარო თანამდებობის დაკავებაც აეკრძალა.
სასამართლო ოპოზიციონერ პოლიტიკოსს წულუკიანის კომისიის მოთხოვნის დაუმორჩილებლობას ედავება. ჯაფარიძეს თეა წულუკიანის კომისიაზე გამოუცხადებლობის გამო, 16 აპრილს 20 000-ლარიანი გირაო შეუფარდეს, რის გადახდაზეც მან უარი განაცხადა. ამის შემდეგ ჯაფარიძე დააპატიმრეს და ორთვიანი წინასწარი პატიმრობა შეუფარდეს, დღეს კი სასჯელის ზომა განუსაზღვრეს.

"ლელო – ძლიერი საქართველოს" ლიდერს, მამუკა ხაზარაძეს სასამართლომ 8-თვიანი პატიმრობა მიუსაჯა. აღნიშნული გადაწყვეტილება მოსამართლე ზვიად შარაძემ მიიღო. ოპოზიციონერი ლიდერი სასამართლო პროცესს თავად არ ესწრებოდა. მანამდე მან გირაოს თანხა, 50 000 ლარი გადაიხადა. 8-თვიანი პატიმრობა და 2 წლით თანამდებობის დაკავება აეკრძალა "ლელო – ძლიერი საქართველოს" კიდევ ერთ ლიდერს, ბადრი ჯაფარიძეს. აღნიშნული გადაწყვეტილება მოსამართლე ზვიად შარაძემ მიიღო. ბადრი ჯაფარიძეს აღკვეთის ღონისძიების სახით 50 000-ლარიანი გირაო ჰქონდა შეფარდებული, რაც მან კანონით დადგენილ ვადაში გადაიხადა.